+99455

+994

 Sosial media platformalarından pul qazanma yolları  hələ düşünülüb icra olunmamışdır, lakin şirkətlər sosial mediada mövcudluğunun vacibliyini artıq anlamağa başlayıb. Müştərilərin, potensial auditoriyanın olduğu yerdə olmaq 2021-ci ildə şablon bir fikir kimi səslənir. Lakin müştərilərimizin sadəcə yanında olmağımız işimizi keyfiyyətli edirmi? Onların sadəcə yanında olmaq kifayətdirmi?

 Təsəvvür edin ki, xoşunuza gələn bir insanın yanında sadəcə varsınız. Onun xoşuna gəlmək üçün, özünüzü xatırlatmağınız üçün heç nə etmirsiniz: münasibət qurmağa, söhbət etməyə, maraqlı əhvalat danışmağa və ya birgə kinoya baxmağa belə çalışmırsınız. Sadəcə onun olduğu yerdə biz də varıq. Belə münasibətdən ortaya nəsə çıxa bilərmi? Hər hansı bir irəliləyiş gözləmək olarmı? Məncə yox. Bu halda niyə sosial mediada sadəcə olmaqla kifayətlənək ki?

 Bizneslərin məqsədi mövcud və potensial müştərilərin yanında olmaq, maksimum əlçatan və yaxın olmaq, ortaq dəyərləri bölüşmək və əlbəttə ki, uzunmüddətli və etibarlı münasibətlər qurmaq olmalıdır. Əks halda biz sadəcə “orada varıq”. Bəs bunu necə edək?

Maksimum əlçatan və yaxın olmaq

 Hər kəs internetdədir. Bunu mən demirəm – bunu statistika deyir. İnternetin gəlişi ilə istehlakçı davranışımız da 180 dərəcə dəyişib. Hər hansı bir servis və ya məhsulu küçədəki bannerdən, liftdəki elandan deyil, işlətdiyimiz mobil tətbiqin axtarış sətirindən tapmağa çalışırıq. Hesab edək ki, tapıldıq. Potensial müştəri səhifəyə girir və analiz etməyə başlayır.

  • “Son paylaşım nə zaman olub? Bir neçə saat bundan əvvəl? – Əla”. “Keçən ilin müstəqillik günündə? – Bəlkə bağlanıb işləmirlər? “
  • “Mesaj yazım, görüm işləyirlər?” Burada da bir neçə ssenarimiz ola bilər:
  1. Mesaj yazan kimi avtomatik cavab gəlir: “Hörmətli müştəri, bizim şirkətlə maraqlandığınız üçün təşəkkür edirik. Qısa zamanda sizinlə əlaqə saxlanılacaq. Statistika üçün əla – dərhal cavab. Lakin ondan sonra sorğuya real cavab olmayacaqsa o statistika heç kimə lazım deyil.
  1. Mesaj yazılır, lakin menecerin və ya botun olmamasına görə çox gec cavab verilir. Bu ssenaridə potensial müştərilərimiz həmin məhsulu və ya xidməti başqa, daha aktiv olan şirkətlərdən alacaqlar.

Ortaq dəyərləri bölüşmək

İzləyicilərinizlə bölüşdüyünüz ortaq dəyərlər hansılardır? Bazar oxşar, ortalama eyni qiymətli məhsullarla dolu olanda sizin fərqlənmə şansınız yalnız emosiyalara bağlıdır. Məhz buna görə müştərilərlə brendin arasında oxşar dəyərləri bölüşmək çox vacibdir. Çünki rasional arqumentlər bütün məhsul və xidmətləri eyniləşdirəndə, meydana irrasional qərarlar gəlir. Nə vaxtsa yumorlu, və ya aktual mövzuya toxunduğunuz paylaşım sizin üçün zamanı gəldiyində əlverişli ola bilər.

Lakin burada ehtiyatli olmaq lazımdır. Bir çox şirkətlər həmin emosiya dilini düzgün tapa bilmir. İstənilən səhv işlədilmiş söz, post və ya şəkil sizin əksinizə işləyə bilər. Məhz buna görə bu amilin adını “aktuallığın dalıyca qaçmaq” deyil, “ortaq dəyərləri bölüşmək” olaraq qeyd etmişəm. Müştərinizin portretini yaradın. Onları düşündürən, narahat edən nədir? Və ən əsası: sizin məhsul o problemi necə həll edir? Bu sualın cavabını tapsanız və düzgün istifadə etsəniz müştəri loyallığı hər zaman sizin əlinizdə olacaq.

Uzunmüddətli və etibarlı münasibətlər

Gəldik çatdıq əsas məsələyə.

Səhifəmizi, brendimizi, imicimizi sevən bir insanla satışdan sonra əlaqələrimizi pozuruqmu? – Xeyr. Marketinqin məqsədi insanlarla məhsul və ya xidmətinizi satıb aradan çıxmaq olmamalıdır. Məqsədimiz insanlarla uzunmüddətli və etibralı münasibətlər qurmaq olmalıdır. Bəli, məhz münasibətlər.

Əslində loyallıq proqramları, sosial media kampaniyaları, ünsiyyət və bütün digər komponentlər satmaqdan çox münasibət qurmaq üçün nəzərdə tutulub. Biz potensial müştərilərimizin yanındayıq, onların dəyərlərini, emosiyalarını bölüşürük, problemlərini məshul və ya xidmətimizlə həll edirik, etibar qazanırıq və bu etibarı qoruyub saxlamağı bacarmalıyıq.

Sosial media marketinq tək rəqəmlər deyil. İnsanlarla ünsiyyət qurmaq, onlarla bağlılıq yaradıb

münasibətləri bərkitmək, düşünmək, hiss etmək və hərəkət etməyə vadar etməkdir. Beləliklə:

  • Alıcıya deyil, insana müraciət edin.
  • Emosiyalar vasitəsi ilə ünsiyyət qurun.
  • Emosional bağlantıdan sonra insanların qərarını rasional arqumentlərlə təsdiqləyə bilərsiniz ki, fikirindən dönməsin.

 

Müəllif: Ağarəhim Poladov